ГлавнаяНаши святыеСлужба новомучеников и исповедников Егорьевских

Слyжба святым новомyченикам Егорьевским:

Память священномучеников Андрея, Николая и Николая, преподобномучениц Антонины и Надежды. 

День памяти 23 февраля/7 марта

На велицей вечерни поем, Блажен мyж: 1-й антифон.

На Господи воззвах стихиры на 8, глас 5:

 

Новомyченицы преславнии, кровьми вашими землю освятисте, жизни вечныя наследие приясте, Христовы правды не отвергостеся и ныне неизреченную доброту зрите Владыки своего. Емyже в житии последовавше к Немy желали есте преставитися, Того со дерзновением молите спастися душам нашим.

Пяточисленное сочетание покровителей наших почтим славнаго Андрея и крепкую Николаев двоицу, в житии во Христа облекшихся, сих бо пастырей смерть к Пастыреначальнику восхождение бысть. С нимиже Антонину и Надежду, добродетелей oбраз и монашествующих утверждение, кyпно бо вси молят Владыку о душах наших.

Чyдную кyплю совершили есте новомyченицы всеблаженнии, яко кровию куписте вечную жизнь. Темже и злоyмных мучителей посрамися полк; тии бо восхотеша уловити вас, вы же плоть в руках оставльше ловителей, к Богу возлетели есте, яко oрли, и молите Спаса о душах наших.

Слава, глас 6: На Господа, добропобеднии мученицы все возложше упование, и Богоданною любовию oсиявшиеся богатно, дyши своя за ближних усердно положили есте, темже на небесех обретосте мзду трудов ваших. Дерзновение имyще ко Христу Богу, мир испросите душам нашим.

И ныне, Богородичен, глас тойже: Кто тебе не ублажит, Пресвятая Дево; кто ли не воспоет Твоего пречиcтаго рождеcтва; безлетно бо от Отца возсиявый Сын Единородный, Тойже от Тебе Чистыя пройде неизреченно воплощься, естеством Бог Сый, и естеством быв человек нас ради, не во двою лицу разделяемый, но во двою естеству, неслитно познаваемый: Того моли Чистая Всеблаженная, помиловатися душам нашим.

Вход. Свете тихий: Прокимен дне, и чтения три. 

Пророчества Исаина чтение.

Тако глаголет Господь: вси языцы собрашася вкyпе, и соберyтся князи от них. Кто возвестит сия в них; или яже от начала, кто слышана сотворит вам; да приведyт свидетели своя, и оправдятся, и да услышат, и да рекyт истину. Будите ми свидетели, и Аз свидетель, глаголет Господь Бог, и Отрок Егоже избрах, да познаете и веруете Ми, и разумеете, яко Аз Есмь: прежде Мене не бысть ин Бог, и по Мне не бyдет. Аз есмь Бог, и несть разве мене спасаяй. Аз возвестих и спасох, уничижих, и не бе в вас чyждий. Вы Мне свидетели, и Аз Господь Бог, и еще от начала Аз есмь: и несть от рyк Моих избавляяй, сотворю, и кто отвратит то; сице глаголет Господь Бог, избавляяй вас Святый Израилев.

 

Премyдрости Соломоновы чтение.

Праведных дyши в руце Божией и не прикоснется их мyка. Непщевани быша во oчесех безyмных умрети, и вменися озлобление исход их. И еже от нас шествие сокрушение, oни же сyть в мире. Ибо пред лицем человеческим аще и мyку приимут, упование их безсмертия исполненно. И вмале наказани бывше, великими благодетельствовани бyдут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют: и яко искры по стеблию потекyт: Сyдят языком, и обладают людьми, и воцарится Господь в них во веки. Надеющиися нань разумеют истину, и вернии в любви пребyдут Ему: яко благодать и милоcть в преподобных Его, и посещение во избранных Его.

 

Премyдрости Соломоновы чтение.

Праведницы во веки живyт и в Господе мзда их, и попечение их у Вышняго. Сего ради приимут царствие благолепия, и венец доброты от руки Господни, зане десницею покрыет я, и мышцею защитит их. Приимет всеoрyжие рвение свое, и вооружит тварь в месть врагом. Облечется в броня правды, и возложит шлем, сyд нелицемерен. Приимет щит непобедимый преподобие: Поострит же напрасный гнев во oрyжие: споборет же с ним мир на безyмныя. Пойдут праволучныя стрелы молниины, и яко благокрyгла лyка oблаков, на намерение полетят. И от каменометныя ярости исполнь падyт грады, вознегодyет на них вода морская, реки же потопят я нагло. Сопротив станет им дух силы и яко вихор развеет их, и опустошит всю землю беззаконие: и злодейство превратит престолы сильных. Слышите убо царие, и разумейте, навыкните судии концев земли. Внушите держащии множества, и гордящиися о народех языков, яко дана есть от Господа держава вам и сила от Вышняго.

На литии стихиры: глас 5:

 

Божественнии страдальцы, дyши ваша от страстей свободили есте, телеса же на страсть за Христа вдали есте, сего ради уготовисте себе Духа Святаго жилище, и пришед Христос со Отцем oбитель в вас сотвори. Ныне на небесех трисолнечнаго сияния зарями просвещаеми, светозарнаго нам покаяния благодать подайте и бед всеразличных избавитися нам Христа умолите.

Преславне oтче Андрее, ты Христом данный ти залог верно соблюл еси, стадо словесное добре упасл еси, темже мyченичества подвиг прием, милость Божию приклони на паству свою.

Пасти oвец Христовых поставленный, святе Николае, сам, яко агнец во всесожжение принеслся еси, первопастырю Христу служа и агнцу Божию радостно подражая.

Кровию Христовою люд Божий питавый, мучений чашу кротко испил еси, хлеб жизни верным предлагавый, из руки отстyпников смерть вкусил еси, священномyчениче Николае, Христов свидетелю истинный.

Слава, глас 3: Ни лютость безбожных мучителей, ни скорби изгнания, ни слабость женская победиша вас, святии блаженнии страдалицы Антонино и Надеждо, темже злодейств запинающаго нас древняго исконнаго врага избегнути молитвами вашими да сподобимся.

 

И ныне, Богородичен: Богородице, предстательнице всех молящихся Тебе, Тобою дерзаем, и Тобою хвалимся, и к Тебе все упование наше есть: моли рождшагося из Тебе за непотребныя рабы Твоя.

 

На стиховне стихиры, глас 4:

 

        В песнопениях восхвалим вернии страстотерпцев Егорьевских новомучеников, и к ним сладкопесненно возопим глаголюще: Радуйтеся Андрее Николае и Николае. Радуйтеся Антонино и Надеждо, яко имущии дерзновение ко Христу Богу нашему, мученицы всечестнии: того прилежно молите, спастися верою совершающим всечестную память вашу.

Стих: Воззваша праведнии, и Господь услыша их.

 

      Мужественнейшим помыслом прешедше мучения, чуднии страстотерпцы иереи Божии, сквозе страдания преидосте и преминусте ко спасения широты, наследие приемше небесное Царство: в немже творите о нас Божественныя мольбы, мудрии страдальцы.

Стих: Честна пред Господем смерть преподобных Его.

 

      Во страдании вашем добре подвизавшися, и по смерти нас освеящаете чудес изменением всехвальнии, верою прибегающе в Божественную церковь и торжествующе молим вас, преподобные мученицы Антонина и Надеждо: да избавимся недуг душевных и чудес благодать почерпем.

Слава, глас 6:

 

Новомученицы Егорьевстии достославнии, за жизнь нашу умерщвляеми, в скорбех радующеся, блаженный конец приясте. Тем от нас хвалы приимите и молитеся спастися всем нам.

 

И ныне, глас тойже:

 Богородичен: Творец и избавитель мой Пречиcтая, Христос Господь, из Твоих ложесн прошед в мя оболкийся, первыя клятвы Адама свободи. Темже Ти Всечиcтая, яко Божии Матери же и Деве воистинну, вопием немолчно: радуйся ангельски, радуйся Владычице, предстательство и покрове, и спасение дyш наших.

 

На благословении хлебов тропарь новомyчеников, глас 5, дважды
 и Богородице Дево: единожды.

Веселися о Господе, граде святаго Георгия, пяточисленным осияемь светом всечестных и многострадальных застyпников твоих. Ихже страдания почитающе, страстей свобождаемся, к нимже прибегающе тако вопием: соблюдите в мире чтyщий вас град, и нас от всякаго зла сохраните молящеся присно о душах наших.

 

На утрени

На Бог Господь: тропарь, новомyчеников дважды. Слава, и ныне, Богородичен:

Радуйся, двере Господня непроходимая: радуйся стено, и покрове притекающих к Тебе: радуйся, необуреваемое пристанище, и неискусобрачная, рождшая плотию Творца Твоего и Бога: молящи не оскудевай о воспевающих, и кланяющихся рождеcтву Твоему.

 

По 1 стихословии седален, глас 1.

Возсия днесь память ваша, новомyченицы всехвальнии, верных мысли веселящая, страсти отгонящая, тьмы неверия изъемлющая, юже совершающих покрыйте от бед и искушений житейских.

Слава, и ныне, Богородичен:

Пречиcтеи рyце Твои Дево Мати, простерши, покрый уповающыя на Тя, и Сыну Твоему зовyщия: всем подаждь Христе, милоcти Твоя.

 

По 2 стихословии седален, глас 4.

Капли кровей и слез ваших, многострадальнии новомyченицы егорьевстии, иже землю нашу оросиша, аки лозу Церковь Христову питают. Мы же безплодное рождие да не явимся, всеславнии, но покаянием принесем плоды благовонныя добродетелей.

Слава, и ныне, Богородичен:

Безневестная Чистая Дево Богородице, едина верных предстательнице и покрове, бед и скорбей, лютых обстояний вся избави, на Тя надежду, Отроковице, имyщия, и дyши наша спаси мольбами Твоими.

 

Величание:

Величаем вас, Святии новомyченицы егорьевстии, и чтим честная страдания ваша, яже за Христа претерпели есте.

 

Псалом избранный:

Бог нам прибежище и сила,

Помощник в скорбех, обретших ны зело.

Сего ради не убоимся, внегда смущается земля.

Боже, кто уподобится Тебе; да не премолчиши, ниже укротиши, Боже.

яко се врази Твои возшумеша, и ненавидящии Тя воздвигоша главу.

На люди твоя лукавноваша волею и совещаша на Святыя Твоя.

Положиша трупия рабов Твоих брашно птицам небесным,

Плоти преподобных Твоих зверем земным.

Разжегл еси ны, якоже разжизается сребро.

яко Тебе ради умерщвляеми есмы весь день.

Вменихомся, яко oвцы заколения.

 

По полиелеи седален, глас 4:

 

Претерпевшим до конца спасение oбещавый Господь, узрев ваше чистое житие и славныя подвиги, содела вас украшение благославное града святаго Георгия, и наследницы Царствия Своего. Темже молите Христа Бога спастися почитающим любовию святyю память вашу.

Слава, и ныне, Богородичен:

Стена непобедимая нам христианом еси Богородице Дево, к Тебе бо прибегающе невредими пребываем, и паки согрешающе, имамы Тя молитвенницу. Тем благодаряще вопием Ти: радуйся Благодатная, Господь с Тобою.

 

Степенна 1-й антифон 4-го гласа.

Прокимен, глас 4: Проидохом сквозе oгнь и воду, и извел еси нас в покой.

Стих: Пролияша кровь их, яко воду.

Евангелие от Матфея, зачало 36.

По 50 псалме стихира, глас 6:

 

Град святаго Георгия ликyет о памяти вашей, доблественнии новомyченицы, и вси верно сошедшеся совершаем ваше светоносное торжество, вы бо вражие насилие попрасте и тьму неверия разрушисте, мы же тако вам вопием: не престайте молити о рабех своих.

Канона два: первый Богородице со ирмосом на 6 «Воду прошед, яко сушу»:

Таже канон новомyченников на 8, глас 8.

Песнь 1, ирмос:

Колесницегонителя фараона погрузи чудотворяй иногда, моисейский жезл крестоoбразно поразив, и разделив море: Израиля же беглеца пешеходца спасе, песнь Богови воспевающа.

Припев: Святии новомyченицы егорьевския, молите Бога о нас.

 

Жителие бысте града святаго Георгия, егоже мучению и подвигу подражасте, ныне Победоносца великаго в раи сожителие славнии явистеся, молитеся о нас немощных, песнь вам воспети дерзающих.

Прииди и стани с нами великомучениче и победоносче Георгие, града и пределов наших покровителю чyдный, и oсенив вся ны твоим предстательством, oгради от всякаго зла, почитающих новомyчеников егорьевских память святyю.

Из глубин адовых изшедший змий неверия и богоборства достояние Господне начат поглощати, вы же, свидетелие крепции славы Божия, твердыми адамантами веры явистеся, о нихже сокрушишася зубы поглотившаго их.

 

Страданий терпением, зело скоро oбителей небесных достигоша, святии мученицы егорьевстии, терпением же лютых скорбей, яко копием главу гордаго врага поразисте, темже, молим, и нам царствия Христова достигнути помозите, козней демонских избегше.

Богородичен: Крепким Твоим покровом, Чистая, от всех навет вражиих невредимы сохрани рабы Твоя: Тя бо Едину стяжахом помощницу и прибежище в бедах.

 

Песнь 3, ирмос:

Ты еси утверждение притекающих к Тебе Господи, Ты еси свет омраченных, и поет Тя дух мой.

 

Устрелением от безбожных смерть приявшии, и дух свой Христу предавшии, стрел oгненных всегубителя избегнути нам молите.

Жертву хваления, священномученицы, в храме Божием приносили есте, напоследок же сами жертвою живою ставше, и дyши ваша чистии соделавше храми, в них же Бога прияли есте.

Избавления от лютых и безчисленных зол, страдальцы егорьевстии, почитающим болезни ваша, подайте.

Владыце подобящеся мyченицы святии яко агнцы на жертву ведошася, да кротостию своею милосердие Божие на землю нашу приклонят.

Богородичен: Спасе мир Богородице, от утробы Твоея воплотившееся слово Божественное, Егоже почитающе, благочестно поем Тя.

 

Седален, глас 4:

 

Светильницы явистеся в земли егорьевстей, мглу безбожия отгоняюще, Христу, непорочному Агнцу подобящеся и Сего житием своим проповедающе, сами, яко агнцы заклани бысте, в терпении укрепляеми Духом Святым.

Слава, и ныне:

Ты еси стена тверда, Ты еси покров державен и крепкое в скорбех прибежище, Дево Всенепорочная, пресyщнаго Бога рождшая, со святыми новомучениками непрестанно моли, оставление прегрешений и исправление жития подати, верою и любовию чтyщим Тя.

 

Песнь 4. ирмос:

Ты моя крепость Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив, тем с пророком Аввакyмом зовy Ти: силе Твоей слава Человеколюбче.

Крепостию Христовою вооружився, и мучений стезею прошед, священномyчениче Николае, со святых чинми достойно сликовствyеши ныне, победный венец приим.

Предстоял еси пред судищем мучителей злочестивых, и ложь никакоже из уст твоих изыде, иерее честный Николае, правды Христовы мерило вернейшее.

Верою украшен, яко солнце лучами, тьму неверия прогоняеши, священнопроповедниче Николае, ради Христа, Сына Божия, во плоти пришедшаго, плоть твою не пощадел еси, дyх же свой в рyце Его предавый, темже не остави нас, верно блажащих тя.

 

Христу подобяся, от Иyды oкаяннаго преданному, предателей коварства и ты терпиши, славне, незлобием же Владыки украшен, зовеши Ему: силе Твоей слава Человеколюбче.

Богородичен: Связаных нас пленицами многих прегрешений, разреши Твоими молитвами, Пренепорочная, тучи слез подавая зовyщим Решителю грехов: силе Твоей слава, Человеколюбче.

 

Песнь 5. ирмос:

Вскyю мя отринул еси от лица Твоего Свете Незаходимый, и покрыла мя есть чуждая тма oкаяннаго; но обрати мя, и к свету заповедей Твоих пути моя направи, молюся.

Священными подвиги низлагающе беззаконных дерзость, Андрее чyдне, и в мучениих был еси в начале пресвитеров [1] люда Божия, пастырем и пасомым благочестия oбраз являя.

Белаго собора настоятелю славный, дyшу твою кровьми oмыв, белоoбразною украсися красотою, темже и наше oкаянство отъемше, дyши наша убели, яко снег.

Благочиния правило, терпения oбраз показyя Господь священномyченика Андрея, на свещнице церковнем сего постави и в горниле мучений сожег, паления страстей нас избавляет.

Сохрани молитвами твоими, oтче Андрее, от искушений и бед чтyщия тя; град твой не остави, к тебе бо прибегаем, стадо твое, пастырю верному и милостивому ходатаю о душах наших.

Богородичен: Честнейшую Херувим, превысшую Небес, новомyчеников славное ограждение, всей твари Застyпницу, едину Богородицу песньми почтим.

 

Песнь 6. ирмос:

Очисти мя Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.

Твоими болезньми, славне священномучениче Христов Николае, даруй очищение душевным сквернам нашим, и избавление грехов излиянием кровей твоих чтyщим тя подай.

Приложися тебе враг началозлобный и слуги своя подвигну низложити святыя веры твоея крепость, но не возможе: во всеoрyжие бо Христово, славне, одеял еси себе.

Идеже праведных дyси, идеже Церковь перворожденных, идеже священномyчеников собори, с веселием вселился еси, многотерпеливе Николае.

Богородичен: Невместимое Слово, во Твоем чреве удобно рождши, Боговместимая Скиние, утесняющаго нас приложеньми лютыми, скоро избави, Дево, молитвами Твоими.

Кондак, глас 7:

 

В пределех егорьевстех просиявшии, яко звезды новоявленнии, священномyченицы честнии: Андрее, пресвитеров правило, с ним и два страдальца славных, Чудотворцу Мирликийскому соименитых, со ангелоподобными Антониною и Надеждою, вашу память верно празднующих посетите и прелести мрак отгнав, грехов оставление испросите, чтyщим любовию честная страдания ваша.

Икос:

Священства oдеждею украшени, и девства светлый хитон мyченическими кровьми oбагрившии, чистою жертвою и совершенною ставшии, принесостеся ныне в горний жертвенник. Темже, якоже молнии тьму неверия oблиставшия, яко Духа храмы, яко Церкве твердыя столпи вас вемы, мyченицы, и чтем любовию честная страдания ваша.

Песнь 7. ирмос:

От иудеи дошедше oтроцы, в Вавилоне иногда, верою троическою пламень пещный попраша, поюще: Отцев Боже благословен еси.

 

Красота постников и страдальцев слава явистася святая двоица: Антонина и Надежда, в воздержании и терпении искyствовавше, ловлений лукаваго избегоста, победы же славныя венцы восприимше, верных мысли удивиста.

Пресвятыя Троицы служителие святии, во oбитель Ея прибегоста и Трисолнечным светом озарившиеся преподобномученицы Антонина и Надежда светолепными лучами нас озаряют.

В некрепких телесех, в сосyдех яко немощнейших женскаго естества, крепость ангельскую восприясте, святии преподобномученицы Антонино и Надеждо, силою Прославльшаго вас, немощи наша укрепите.

Сеятель Благий, землю плодоносну дyш ваших узрев, семя жизни издетска вложи, и принесшим вам плод сторичный, мучений серпом жатву собирает.

Богородичен: Горе на небесех Херувимы носимый, доле раждаемь руку Твоею носится, Пресвятая, Чистая, яко совершен человек, погибающий мир обновляя.

 

Песнь 8. ирмос:

Седмерицею пещь халдейский мучитель Богочестивым неистовно разжже силою же лyчшею спасены сия видев, Творцу и Избавителю вопияше: oтроцы благословите, священицы воспойте, людие превозносите во вся веки.

Антонино блаженная, oсьми лет сyщею, во oбитель пришла еси, вере Христовой всею душею отдавшися, и сию твердо соблюдши, моли нашей вере укреплятися и ересей нашествию отринуту быти.

Путем тесным шедый, Христу уневестивыйся, мучением украшается преподобномyчениц полк блаженный, в немже Антонина и Надежда просиявше, сугyбым подвигом и борением сугyбыя венцы себе исплетоста.

Яко изгнан бысть подвигоположник Господь, то и слуги его изгнани быша, темже мyчиму Жениху, и невесты мучение прияша, но обаче вшедше в радость Господа своего, чтyщим их оставление грехов ходатайствуют.

Древле Еве праматери равнобожие льстивне предлагавый от жен святых ныне попирается, отвергше бо того злокозненный совет, пощением и мyками истинное обожение получают.

Богородичен: Словом единым вся соделавый, паче слова воплощается из Тебе, Дево Чистая, новомyченики венчавый, победно врага поправшыя.

 

Песнь 9. ирмос:

Воистину Богородицу Тя исповедуем спасеннии Тобою Дево Чистая, с безплотными лики Тя величающе.

Святии новомyченицы егорьевския, к краеугольному каменю Христу Богу прибегшии и волны свирепых мyк отразившии, с безплотных ликами вас величаем.

Священномyченицы блаженнии, Андрее и Николаев двоице славная, вязати и решити имyщии власть, грехов наших разрешите узы.

 

Светом трисолнечным озарени, страстоносицы Антонино и Надеждо, возжелевшии ангельское житие и тех чином совокyпльшиеся, Подвигоположника и Владыку всех о нас молите.

Ведомии и неведомии мyченицы, новии доблии страдальцы от Христа венчавшиеся, сродницы наши, молитеся просвещение даровати верою хвалящим вы.

 

Богородичен: Отчаявшихся надежда и предстательнице верных, настави ко спасению многими грехи отягченных и гневу и скорбем подвергшихся.

Светилен, глас 1:

 

Пятозарная страдалец свеща богатным озаряема светом, благодатию своею всех просвещает. Сих почитающе, Христа светоподателя молим зарею Божества нас осияти.

Богородичен: Державным Твоим покровом Чистая, нас рабов Твоих от навета вражия сохраняй всегда невредимы: Тя бо едину стяжахом прибежище в бедах.

 

На хвалитех стихиры новомyчеников на 4, глас 1:

 

Мyченицы святии, священства светом облистаеми, и в страданиих просиясте невечернею светлостию. К свету же незаходимому преставльшиеся, молите о нас дароподателя Господа со священномyчеников собором, емyже сочетавшеся, чтyщих вас поминайте.

Мyченицы святии, вас, пастырей Божеcтвенных, и началопастыря Христа подражателей, молим: нас, сyщих вашего стада oвец, спасайте присно от лукавых волков всемощными молитвами вашими.

Мyченицы святыя, девы чистыя, Христу пострадавшему и страсти наша умертвившему, уневестившеся, и Его Божеcтвенным стопам последовавше, многие раны приясте, и горечь страстей отринувше, сладости небесныя вкусили есте, темже молим вас: и наша усладите сердца.

Слава, глас 8: Землю, безбожием изсохшую и Богопротивлением неплодну явившуюся, кровьми своими напоили есте, молитвою же и пощением сию уплодоносивше, и семя слова Божия в ню ввергше, в землю кротких преселилися есте. Ныне же дyши наши плодоносны Богу явити, помозите нам предстательством своим.

И ныне, глас тойже: Владычице, приими молитву раб Твоих, и избави нас от всякия нyжды и печали.

 

Славословие великое. И отпyст.

 

На литургии, блаженны от канона песнь 3-я, и 6-я, на 8. Прокимен, глас 4: Святым, иже сyть на земли его, удиви Господь вся хотения своя в них. Стих: Предзрех Господа предо мною выну, яко одеснyю мене есть, да не подвижуся. Апостол к Римляном, зач. 99, или ко Евреем, зач. 330. Аллилyиа, глас 4: Воззваша праведнии и Господь услыша их, и от всех скорбей их избави их. Стих: Многи скорби праведным и от всех их избавит я Господь. Евангелие от Луки, зач. 106. Причастен: Радуйтеся праведнии о Господе, правым подобает похвала.

 

МОЛИТВА СВЯТЫМ НОВОМУЧЕНИКАМ И ИСПОВЕДНИКАМ ЕГОРЬЕВСКИМ.

Святии Славнии и всехвальнии новомученицы и исповедницы земли Егорьевской! Собрании в храме сем и пред иконою вашею святою поклоняющиеся люди молят вас, известныя желания нашего хадатаи: молите с нами и о нас умоляемого от своего благосердия Бога, да милостивно услышит нас просящих Его благостыню, и не оставит вся наша ко спасению и житию нуждная прошения. Да укрепит всякое начало и власть имже судил еси правити на земли. Воинство православное да сохранит, оружием истины и благоволения венчает их и силы возстающих враг наших да низложит. О храбрые воини небеснаго Царя победившие земные прелести всем в скорби и обстоянии сущим многомощное явите заступление ваше.

Вы Богом избрании бывше, кровьми очистишася и венцем страдальческим от Христа украшени бысте о немже дивную кончину прияли есте. темже убо смиренно молимся вам: молите милостиваго Владыку, да подаст нам дух вашея ревности ко хранению святых его заповедей, яко да текше по стопам вашим, возможем земное поприще в добродетельном житии без порока прейти, и в покаянии достигнути преславных селений райских и тамо купно с вами прославляти Отца и Сына и Святаго Духа, во веки веков. Аминь.

[1] Это намек на то, что сщмч. Андрей был благочинным и имел сан протоиерея, как в молитве на протоиерейство говорится: «В начале стояти пресвитеров люда Твоего»